Si Ciceron de son art de bien dire
(Par don divin) héritier m’avoir faict,
Je ne pourroys suffisamment escrire
Les grands vertus qui vous rendent perfaict.
Qui cognoistra de voz graces l’effaict
Qui est conduict d’admirable sagesse,
Il ne verra en vous rien imperfaict,
Mais tout honeur joinct à vostre noblesse.
J’ay (de ma part) en vous cognu sans cesse
Un noble cueur plein de toutes doulceurs,
Un Jugement qui voz vertus confesse
Dignes d’avoir los par les successeurs.
Voyla pourquoy en tesmoignages seurs
Qu’immortel los ma plume vous réserve,
Serez aymé des Pégasides Seurs,
Dedans le sein de la blonde Minerve.